Молитва о воинах и о военнослужащих

Пресвята́я Богоро́дице, те́плая на́ша Засту́пнице и спасе́ние всем, призыва́ющим Тя! Не и́мамы ины́я по́мощи, ра́зве Тебе́, Влады́чице, Ты бо еси́ еди́на наде́жда и упова́ние на́ше. Не пре́зри слез на́ших и не отри́ни усе́рдных моле́ний, но спаси́ от сме́рти и от бед сохрани́ во́инов на́ших и́мярек, на по́ли бра́ни су́щих. Укрепи́ их дух, утверди́ в за́поведех Сы́на Твоего́, умно́жи в них ве́ру, просвети́ ум, даждь му́жество во бра́нех, да, непоро́чно испо́лнивше ра́тное служе́ние, це́ли и невреди́ми возвратя́тся в до́мы своя́ и просла́вят пресвято́е и́мя Отца́, и Сы́на, и Свята́го Ду́ха, и Твое́ ми́лостивное заступле́ние. Ами́нь.

Помяни́, Го́споди, во́ины Твоя́ правосла́вныя имена, подвиза́ющияся за и́стину проти́ву соблазне́нных и ожесточе́нных дре́вним человеконенави́стником. Укрепи́ их се́рдце, сохрани́ их саме́х от ожесточе́ния и те́мныя мсти́тельности, да́руй им му́жество и безстра́шие, терпе́ние и упова́ние на по́мощь Твою́, изба́ви их от кова́рства вра́жия и от вся́кия вра́жеския жесто́кости и по́длости сохрани́.

Го́споди Бо́же наш, послу́шавый Моисе́я, просте́рша к Тебе́ ру́це, и лю́ди Изра́илевы укрепи́вый на Амали́ка, ополчи́вый Иису́са Нави́на на брань и повеле́вый со́лнцу ста́ти: Ты и ны́не, Влады́ко Го́споди, услы́ши нас, моля́щихся Тебе́. Укрепи́ си́лою Твое́ю страну́ на́шу и во́инство ея́, бра́ни умири́ и мир утверди́. Посли́, Го́споди, неви́димо десни́цу Твою́, рабы́ Твоя́ заступа́ющую во всех; [а и́мже суди́л еси́ положи́ти на бра́ни ду́ши своя́ за ве́ру и Оте́чество, прости́ согреше́ния их и в день пра́веднаго воздая́ния Твоего́ возда́й венцы́ нетле́ния:] я́ко Твоя́ держа́ва, Ца́рство и си́ла, от Тебе́ по́мощь вси прие́млем, на Тя упова́ем, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Го́споди, Иису́се Христе́ Бо́же наш, моли́твами Всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельством честны́х Небе́сных Сил безпло́тных, святы́х враче́й и цели́телей: апо́стола и евангели́ста Луки́, святы́х чудотво́рцев и безсребре́ников Ки́ра и Иоа́нна, Космы́ и Дамиа́на, свята́го великому́ченика Пантелеи́мона и учи́теля его́ Ермола́я, преподо́бнаго Ага́пита Пече́рскаго, святи́теля земли́ Кры́мския и испове́дника Луки́, исцели́ во́ина Твоего́ и́мярек, на по́ли бра́ни ра́нами уя́звленнаго, уте́ши его́ наде́ждою на Тя и ве́рою правосла́вною укрепи́. Услы́ши, Го́споди Человеколю́бче, воздыха́ния сро́дник его́. Да, воста́в от одра́ боле́зни, послу́жит и порабо́тает Тебе́ до сконча́ния жи́зни своея́ и просла́вит Тя, исцеля́ющаго и врачу́ющаго вся, со Отце́м и Святы́м Ду́хом. Ами́нь.

К кому́ возопию́, Влады́чице? К кому́ прибе́гну в го́рести мое́й, а́ще не к Тебе́, Цари́це Небе́сная? Кто плач мой сле́зный и воздыха́ние мое́ прии́мет, а́ще не Ты, Ма́ти Бо́жия, Засту́пнице и прибе́жище во всех беда́х нам гре́шным? Услы́ши вопль мой, Всемилосе́рдая Цели́тельнице, я́ко умно́жишася ско́рби се́рдца моего́, и яви́ ми́лость Свою́ на одре́ боле́зни возлежа́щему и ра́ною уя́звленному, ча́ду моему́ во́ину и́мярек, исцели́ его́ тя́жкия душе́вныя и теле́сныя боле́зни, и воздви́гни от одра́ не́мощи це́ла и всесоверше́нна, да воспева́ет Твое́ те́плое заступле́ние. Ами́нь.

О Всепе́тая Богоро́дице, всех скорбя́щих Ра́досте и оби́димых Засту́пнице! Услы́ши моли́тву мою́, проше́ния моего́ не отри́ни и поми́луй ча́до мое́ (отца́ моего́, му́жа моего́), во́ина и́мярек в плене́нии су́щаго! Сохрани́ его́ це́ла и невреди́ма, огради́ его́ от зло́бы плени́вших его́ и не даждь ему́ убие́ну бы́ти от рук их, ве́ру и́стинную в нем укрепи́ и ско́ро тя́жкаго плене́ния изба́ви, да в ра́зуме воспева́ет Тя, Цари́це Небе́сная, и Сы́на Твоего́, Го́спода на́шего Иису́са Христа́, со Безнача́льным Его́ Отце́м, и Пресвяты́м и Благи́м и Животворя́щим Его́ Ду́хом, во ве́ки веко́в. Ами́нь.

Преблаже́ннии и богоно́снии избра́нницы Христо́вы: многосве́тлая звездо́, Крести́телю и Предте́че Спа́сов Иоа́нне; святи́телю преди́вный и ми́лостивый, вели́кий чудотво́рче Нико́лае; святы́й великому́чениче и ско́рый плене́нных свободи́телю, Победоно́сче Гео́ргие; вели́кая в жена́х Анастаси́е Узореши́тельнице и вси святи́и! Мо́лим вас мы недосто́йнии: укрепи́те во́инов (во́ина) и́мярек, в плене́нии су́щих (суща́го), от уз вра́жиих их (его́) изба́вите, вся́каго зла́го обстоя́ния свободи́те и на спасе́ния стези́ напра́вите, да, в до́мы своя́ возврати́вшеся, просла́вят (в дом свой возврати́вся, просла́вит) И́стиннаго Бо́га, Отца́, и Сы́на, и Свята́го Ду́ха, и ва́ше ми́лостивое предста́тельство, во ве́ки веко́в. Ами́нь.

О Всесвята́я Влады́чице Богоро́дице, Взыска́ние поги́бших, стра́нных Пита́тельнице и заблу́ждших Путеводи́тельнице! Во́ина и́мярек, о не́мже не и́мамы извеще́ния, покры́й честны́м Твои́м омофо́ром, сохрани́ от всех напа́стей вра́жиих, изба́ви плене́ния и лю́тыя сме́рти, от отча́яния огради́, да с благодаре́нием и любо́вию воспева́ет Твое́ те́плое заступле́ние. Ами́нь.

В ме́сте зла́чне, в ме́сте поко́йне, иде́же ли́цы святы́х веселя́тся, ду́шу раба́ Твоего́ преста́вленнаго (рабы́ Твоея́ преста́вленныя) во́ина имя поко́й, Христе́, еди́не Ми́лостиве.