Молитва матери о сыне на войне

К кому́ возопию́, Влады́чице, кому́ пове́м скорбь се́рдца моего́, а́ще не Тебе́, Цари́це Милосе́рдая? Душа́ моя́ смяте́ся, и уны́ дух мой, но ско́ро услы́ши моли́тву мою́, ве́ру укрепи́, терпе́нием огради́ и благо́ю наде́ждою оживи́. Пресвята́я Богоро́дице, Де́во Чи́стая! Заступи́, сохрани́, покры́й ми́лостию Твое́ю ча́до мое́, во́ина и́мярек, на по́ли бра́ни су́щаго, утверди́ его́ в ве́ре и́стинней, огради́ от зло́бы враго́в ви́димых и неви́димых, сохрани́ его́ це́ла и невреди́ма, пода́ждь си́лу ра́тное свое́ служе́ние, я́ко крест, безпоро́чно понести́ и па́ки его́ в дом о́тчий возврати́. Ами́нь.

Го́споди Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере услы́ши мя, недосто́йную рабу́ Твою́! Го́споди, в ми́лостивой вла́сти Твое́й ча́до мое́, во́ин имя, поми́луй и спаси́ его́, и́мене Твоего́ ра́ди. Го́споди, прости́ ему́ вся согреше́ния во́льная и нево́льная, я́же сотвори́ пред Тобо́ю. Го́споди, наста́ви его́ на и́стинный путь за́поведей Твои́х и ра́зум его́ просвети́ све́том Твои́м во спасе́ние души́ и исцеле́ние те́ла. Го́споди, благослови́ его́ служе́ние во́инское на су́ше, на возду́се и в мо́ри, в пути́ и на ка́ждом ме́сте влады́чества Твоего́. Го́споди, сохрани́ его́ си́лою Честна́го и Животворя́щаго Креста́ Твоего́ под кро́вом Твои́м святы́м от летя́щия пу́ли, стрелы́, меча́, огня́, от смертоно́сныя ра́ны, от потопле́ния водна́го и напра́сныя сме́рти. Го́споди, огради́ его́ от вся́ких враг ви́димых и неви́димых, от вся́кия беды́, зол и напа́стей, преда́ния и плене́ния. Го́споди, исцели́ его́ от вся́кия боле́зни и ра́ны, от вся́кия скве́рны, и осла́би его́ ско́рби душе́вныя. Го́споди, да́руй ему́ благода́ть Ду́ха Твоего́ Свята́го на мно́гая ле́та, здра́вие и целому́дрие, е́же жи́ти во вся́ком благоче́стии и любви́, в ми́ре и единоду́шии с нача́льствующими, с бли́жними и да́льними. Го́споди, просвети́ его́ ум, умно́жи и укрепи́ си́лы душе́вныя и теле́сныя, здра́ва и благополу́чна возврати́ его́ в роди́тельский дом. Всеблаги́й Го́споди, да́руй мне, недосто́йной и гре́шной рабе́ Твое́й имя, роди́тельское благослове́ние на ча́до мое́ имя, в настоя́щее вре́мя у́тра, дне, но́чи, и́бо Ца́рствие Твое́ ве́чно, всеси́льно и всемогу́щественно. Ами́нь.

Пресвята́я Влады́чице Богоро́дице, благослове́нная Ма́ти Го́спода на́шего Иису́са Христа́, И́же во́лею нас ра́ди на Кресте́ пострада́ и Тя всеми́лостивую Засту́пницу ве́рным Свои́м дарова́! Припа́даю к Тебе́ аз недосто́йная, оба́че упова́ния на ве́лию ми́лость Бо́жию не оставля́ющая.

Се сын (супру́г, брат) мой имя призва́н на ра́тное де́ло, вели́каго бе́дствия ра́ди, Оте́чество на́ше посети́вшаго. Дале́че есть сын (супру́г, брат) мой от мене́, опа́сности сме́ртныя близ, и поко́я лиши́хся аз ны́не. К кому́ пребе́гну в смяте́нии ду́ха моего́, а́ще не к Тебе́, Цари́це Небе́сная? Кто воздыха́ние мое́ прии́мет, а́ще не Ты, Многоми́лостивая Влады́чице? Услы́ши у́бо плач мой и не пре́зри мене́, но яви́ся сы́ну (супру́гу, бра́ту) моему́ Ма́ти и Засту́пница, мне же блага́я Уте́шительница!

Молю́ Тя, бу́ди с ним на всех путе́х, от вся́каго зла его́ сохраня́ющи. Оде́й его́ во броню́ ве́ры и пра́вды Бо́жия, я́же си́лу ору́жия превосхо́дит, соблюди́ его́ хода́тайством святы́х, от мене́ умоля́емых. Укрепи́ мы́щцу его́ на по́ли бра́ни, поостри́ се́рдце его́ му́жеством пра́ведных, да яви́тся ве́рою победоно́сен. Приими́ его́ в ру́це защище́ния Твоего́: от молниено́снаго о́гненнаго уда́ра вра́жескаго сохрани́, от пуль и оско́лков стено́ю неизрече́ннаго милосе́рдия Твоего́ загради́. Моли́ся ко Го́споду, да мину́ет его́ кова́рство и по́длость злых челове́к, и да по́слет ему́ в сре́тение до́брыя лю́ди, единомы́слием и по́мощию дух его́ укрепля́ющия и ра́дующия.

А́ще гла́дом одержи́мь бу́дет, напита́й его́ от изоби́лия щедро́т Твои́х, плода́ми и произрасте́ниями земли́ снабдева́я, я́коже всегда́ пита́еши нас благопло́дием доброде́телей Христо́вых. Егда́ возжа́ждет — росо́ю прохлажде́ния Твоего́ напои́ его́, я́коже ве́рных свои́х от ве́чнаго Исто́чника Боже́ственною благода́тию напоя́еши при́сно. Егда́ хла́дом объя́т бу́дет — простри́ к нему́ горя́чия лучи́ ми́лости Све́тлаго и Трисве́тлаго Со́лнца, Сы́на Твоего́. Ру́це его согре́й теплото́ю моли́тв мои́х, но́зе его́ омы́й слеза́ми печа́лования моего́, о́чи его́ освети́ све́том наде́жды моея́, внегда́ моли́тися ми к Тебе́. А́ще изнемо́жет — бу́ди ему́ наде́жная опо́ра, кре́пким упова́нием на Бо́га его́ утвержда́ющи. А́ще уны́ет он — дух его́ возвесели́ и ра́дость о Ду́се Свя́те в души́ его́ возроди́. А́ще ура́нен или́ в боле́зни бу́дет — даждь ему́ терпе́ние в ра́нах, ми́лостию Свое́ю посети́ и ру́це врачу́ющих его́ благослови́. Умоли́ Сы́на Твоего́ и Бо́га на́шего извести́ его́ от врат сме́ртных и от одра́ боле́зни воздви́гнути, да вме́сте с на́ми благодари́т и сла́вит Тя. А́ще же плене́н бу́дет, ста́ни в по́мощь ему́ та́мо, иде́же ни оте́ц, ни ма́терь, ни брат, ни еди́н от при́сных его́ возмо́жет помощи́ ему́: не допусти́ его́ до отча́яния, дух его́ укрепи́, от жесто́кости вра́жия его́ сохрани́ и неврежде́нна в стан оте́ческий из узи́лища изведи́.

Отжени́ от него́ страх сме́ртный и всякое наведе́ние бесо́вское, глубо́кий и неотъе́млемый мир да́руя и несомне́нным упова́нием на Бо́га укрепля́я. Соблюди́ его́, да удаля́ется от вся́каго беззако́ния и безче́стия в похо́де ра́тнем, да та́ко благоволе́ния Бо́жия и защи́ты Его́ не лише́н бу́дет и с ми́рною и чи́стою со́вестию на Суд Бо́жий предста́нет. Прошу́ Тя, Пресвята́я Влады́чице Богоро́дице, моли́твами свята́го Архистрати́га Бо́жия Михаи́ла, великому́чеников Гео́ргия Победоно́сца и Дими́трия Солу́нскаго, святы́х Сорока́ му́чеников Севасти́йских, святи́теля Никола́я Мирлики́йскаго чудотво́рца, великому́ченика цели́теля Пантелеи́мона и всех святы́х покрови́телей Христо́вых во́инов, не посрами́ ча́яния моего́ и не оста́ви мене́ безотве́тну, да́руй вско́ре сы́на (супру́га, бра́та) моего́ це́ла и здра́ва во объя́тия моя́! Да вку́пе со все́ми почита́ющими неистощи́мую ми́лость Твою́ просла́вит Го́спода Бо́га на́шего, Пресвяту́ю Тро́ицу, Отца́, и Сы́на, и Свята́го Ду́ха, ны́не и в безконе́чныя ве́ки. Ами́нь.

Го́споди Иису́се Христе́, Сы́не Бо́жий, поми́луй, спаси́ и сохрани́ сы́на (супру́га, бра́та) моего́, во́ина имя! Бо́же, ми́лостив бу́ди сы́ну (супру́гу, бра́ту) моему́, во́ину имя! Ма́ти Бо́жия, сохрани́ сы́на (супру́га, бра́та) моего́, во́ина имя под кро́вом Твои́м! Святы́й (имя святого), моли́ Бо́га о сыне (супру́ге, бра́те) мое́м, во́ине имя!

Бо́же чуде́сных, И́же вели́кая и чу́дная соде́лавый, дре́вняго Изра́иля Моисе́ем свободи́вый го́рькия рабо́ты фарао́новы, руко́ю Твое́ю десно́ю сего́ наста́вив, и невреди́ма соблю́д к земли́ обетова́нной; и пе́рвее у́бо пти́цами о́ными в сы́тость напита́вый многочи́сленныя лю́ди в пусты́ни зело́ сухо́й, пото́м одожди́вый ма́нну, я́коже во́ду от исто́чника приснотеку́щаго; И́же несеко́мый ка́мень исто́чники вод одожди́ти устро́ивый, и всех удовли́вый проли́тием воды́ жа́ждею изнуря́емых; си́це и ны́не во́ина имя напита́й обы́чным Твои́м человеколю́бием и бла́гостию, пода́ждь ему́ потре́бная, покажи́ и в нем вели́кая Твоя́ и чу́дная, и напита́й его́ в сы́тость благослове́нием Твоея́ бла́гости: вся бо возмо́жна Тебе́, не невозмо́жно же Тебе́ ничто́же. Ей, Го́споди Бо́же наш, напита́вый тьма́ми лю́ди ма́лыми хле́бы в пусты́ни, напита́й и его́ ны́не неизрече́нным Твои́м благоутро́бием, и не пре́зри моле́ния мене́, гре́шныя и недосто́йныя рабы́ Твоея́, да просла́вится пресвято́е и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.